حاله ميؤوس منها

حاله ميؤوس منها
TAGOLAY بقلم :

ماهو كله كلام والفعل مفيش
حريفه في فن التطنيش
داحنا
اللي دهنا الهوي دوكو
والسما لمعناها بورنيش
واحنا
اللي خرمنا التعريفه
وزرعنا السكر سنترافيش
حررنا القدس
علي الارغول
وعملنا الوحده
نشيد وطبول
رجاله وحريم ميه الميه
بريفكس ومعظمهم دراويش
***********
سته وستين مليون ريس
قفيانهم بتبص لقدام
نرسم ونخطط ونهندس
علي قهوة يني وننه ننام
عقدة مريسه
عند وتربسه
مالهاش ولا نقض ولا ابرام
اهو كده وخلاص
ابريق بيناقش كام بلاص
شلة ايتام
************
الدنيا بقت لخابيط لخابيط
والناس عميان
دكتور وبيفتح كوتشينه ويقرا الفنجان
وبيعمل زار ويحضر
روح شمهورش ملك الجان
داخل مفقود
خارج مولود
لا علاج ولا طب ولا بدنجان
العيشه ضياع
والشرف انباع
حتي الانسان. مبقاش انسان
دا مهندس شيلله يا مهندس شغال فران
ومحاسب عمره مبيحاسب
ولا كان ليه مكان
ولا مره زراعي بيراعي
الله ولا ذمه ولا وجدان
جامعة دندشه
لعب وفرفشه
ناصبين لك سيرك الجامعه زمان
************
لما التعليم بقي مجاني
وبنورث في ملك التاني
وبناكل في بلاط السلطان
فالامن سراب
والدنيا خراب
خرفان بتصارع ويا حيتان
دي وحوش بتدورعلي غابه
مليانه تعالب وديابه
انيابها دولار وعقود اذعان
**************
يا خساره يا مصر يا نور العين
يا بساط من سندس عالشطين
يا صوامع غله بتخزي العين
تستاهلي كتير
عرق وضمير
لكن قتلوكي المصريين
***************