الزمن العاجز

الزمن العاجز
بقلم : TAGOLAY

معلهش والا جم عليك
معدتش تفرق يا بلدنا الطيبه
نفس الوجوه هيه الوجوه
نفس الكلام بالشبر قاعة مصطبه
وبقينا ملطشه للّي هب
والّي دب
في كل جحر وكل زاويه معطبه
عمر اللي زارعين شوك
ما لمو في يوم عنب
ولا التنابله.. كان لهم يوم مرتبه
***********************
اه يا زمن
اه يا زمن ....من غير ميزان
واقف علي سفح التاريخ
خارج علي.... حدود الزمان
اه يا زمن عاجز
قليل الحيله شاب قبل الاوان
كتب سجله
فوق صدور الرقاصات
وتاريخ ميلاده
في الملاهي... والبارات
زمن ملوش مبدأ
ولا منطق
ولا اسنان معووج اللسان
*****************************
اه يا زمن............... درويش
وجلاب......... المصايب
والموقر صاحب الصيع
................. وتجار الحشيش
والنص.. معظمهم نوايب
زمن....... ابن مين
والبودره والزلمكه والترويش
مع مقاولين..... خرايب
زمن الطوارئ والحرايق
............... والهبر والتهبيش
من المال..... اللي سايب
والروشنه والكجولا
والامركا والمستكا
وزباله تتعبي في زكايب
*****************************
يا دي العجب
علي شعب ساد
ونقش تاريخه بالذهب
علي امه كانت
خير امه اخرجت للناس
..........بالدين والادب
فن وعلوم.. طب وكتب
علي امه زرعت
راية العزه
......علي متن السحب
*********************************
انهض يا شعب
الدرب يحلي بالتحدي........ والصراع
واضرب رصاصة الموت
علي زمن التشرزم والتنطع والضياع
امخر عباب الموج
وانسي اللي اشتري.. ومين اللي باع
واغزل بعزم رجال
واحلام الصبايا............ ميت شراع
وان سدوا عنك كل نسمه
وكل ريح
..................متخافش قدّف بالدراع

***************************