شدي حيلك يا بلد

شدي حيلك يا بلد

بقلم : tagolay

هاتو المزاهر....... والدفوف
هاتو.......... الشموع
ضمو الكفوف
واستقبلوا مليون سبوع
يا نوح خلاص جاك المدد
من جيل جديد
مولود براعمه...... بتتولد
جايين الوف
جايين علي طول المدد
.............. صفوف صفوف
وتشدي حيلك.... يا بلد
****************
انا شفتهم وقت... الاصيل
عابرين حدود.. المستحيل
جايين نجيب جايين زويل
بينوروا الليل..... الطويل
بنجوم كتير مالهاش عدد
وتشدي حيلك...... يا بلد
***************
جايين في... غنوه هادفه
احاسيس مشاعر مرهفه
وماهيش حروف متستفه
ابداع بجد
طرب وفن.... وزخرفه
والصوره تبني
مش. ...........تهد
وتشدي حيلك يا بلد
**************
جايين سما حه... واعتدال
لا يوم يمين ولا يوم شمال
ولا فيه هلال ضد الصليب
ومفيش صليب ضد الهلال
الكل نبت النيل
رواه الماء زلال
والايد بايد نبني
ويبقي الحلم ....جد
وتشدي حيلك يا بلد
**************
يا مصر قومي واقلعي توب الحداد
وفتحي عنيكي
واصحي وحرسي علي الولاد
دولا طريق الفرح
فجر العيد............ ودربك للسداد
يا مصر قومي اتحزمي واتشمري
وكبريهم علي الاصول رح تكبري
واذا جم وسالو
عن سلاح لعبور جديد وايام بعاد
قومي فرجي ولادك لهم ولد ولد
وتشدي حيلك................ يا بلد
********************