كلـّنا مسؤول

كلـّنا مسؤول
TAGOLAY بقلم:
في ذكري الشباب الغارق علي الشواطئ الايطاليه

من بين كلام الناس
معرفش غير اسمك
رغم اني شايف قصادي
رسم غير رسمك
هوّا الزمان غيـّرك
والا ده كان اصلك
واللا انا شفتك بعين
عاشق بيحلم بك
*********
كنتي حبيبه بتضوي
في عيون الناس
كنتي غيطان الغله
وروابي الورود والاس
مين اللي قسـّاكي
ونبـّت شوك علي حضنك
مين اللي نسّي
الشمس تتلالا علي شطك
********
وفي الاخر نسيتيني !
نسيتي الحب والاشواق
نسيتي ابنك المشتاق
في نوّة عوّه
وسط الموج تركتيني
وانا بصرخ
تعالي يا مـّه
قبل مموت وضميني
وضاع صوتي
علي ليل الجراح
وايامي وسنيني
سنين القهر والحرمان
وقبل ما عيش قتلتيني
************
سافرت وزادي احلامي
وعزمي وديني ويقيني
وعدتك اني ارجعلك
واملا بطلعتك عيني
قليل الحيله مقدرتش
ومقدرتيش تساعديني
وكان املي اجيك لكن
اخدني البحر سامحيني
اكلني البحر سامحيني

*********