كان يوم

كان يوم
بقلم : TAGOLAY


ماشي علي رملك
بعد الزمان بزمان
صور كتير عدّت
افراح ورا احزان
شفت الطريق مرصوف
شفت الكباري الوف
والارض بتسلـّم
حتي الشطوط الحان
فاكرانا يا سينا
والا نسيتينا
*******
فاكره اما جينالك طوفان وعدّينا
وقعدت عالضفـّه احكي حكاوينا
لما امـّي وابونا
لبسو الشيلان السود
قالو ما تتبدّل الا في يوم موعود
وقالولنا يا زينه
لليوم ده ربـّينا
فتحوا لنا الشباك
شاوروا وبكونا
اختك يا ولد هناك
قاعده بتستنـّاك
حلفت ما تتهنـّي
ولا حتي تتحنـّي
الا علي ايدك تنقش وتتانـّي
********
حلمت يومها بيوم
جوّا التاريخ معلوم
اجيبلهم فرحه
شمس وقمر ونجوم
واطهـّر الصحرا من الغراب والبوم
عهد الله وحفظته حرّم عليه النوم
*************
كان شطها عالي وانا ما عندي حبال
غزلت موّالي وصبري لما طال
ضفـّرت امالي وعملت حبل رجال
جرجس ويوحنا واحمد وعبد العال
كنا قدر محتوم
طوفان هلاك وحسوم
تبـّرنا عاليها
جبنا صياصيها
اعصار جحيم وغيوم
بالدّم مش بالمال
زكـّينا شهر الصوم
*************
شفتي خطاوينا
حبـّيتي حبـّينا
وسهرتي وادّينا
وناديتي لبـّينا
وفي اخر المشوار
عنـّينا غناوينا
وان كان غراب الشوم
عشـّش في ارضك يوم
مكانش بادينا
فاكرانا يا سينا
والا نسيتينا
ان كنتي فاكرانا مسـّي وحيـّينا
ان كنتي فاكرانا مسي وحيينا
وان كنتي ناسيانا يحييك ويحيينا

ا***********