حورية

حورية
بقلم TAGOLAY
ياساده كان ياماكان
قبل الزمن.. بزمان
كان في السما نجمه ... والنجمه ورديـّه
نزلت في ساعة شوق اصل الهوي غيـّه
قعدت في سهرايه......... ويا المراكبيه
البحر شافها وقال
في جمالها كام موال
تقاسيم واغنيه
وغزلها طرحه
منقوشه بالفرحه
علي اد حوريه
********************
شفايفها شط وبحر والشعر حنـّاوي
وعيونها فيروز حر تجرح ولا تداوي
عمل لها طوق فل
لبستله فستان تل
صاب سهمها المسكين
......وتاه مع التايهين
وبقت عروسة الكل
*********************
تمشي..... وتتمخطر
وعلي القلوب تخطر
تامر وتتامـّر
*******
عشّاقها.. بالملايين
دايما راحين جايين
وسنين تجر سنين
*******
وداعها فيه زفـّه
ولقاها باللـّهفه
والحب والخفـّه
*******
في الفجر بربوني سردين سمك بوري
كلـّه علي الرزاق
ونهارها بير مسعود اتمنـّي يا موعود
لقا مفيهش فراق
والقعده في المرسي متعه متخلصشي
فيها صلا ودعاء
*******
فيها كتير ياما
ايوه لها علامه
********
في البحر جنـّيه ......عالبر انسيـّه
حدوته مصريه نايمه علي الميـّه
شبكه في ايد صياد
بيصيد بها عرسان
بدل العريس ميـّه

**************