اه يا بلد

اه يا بلد
بقلم TAGOLAY

ومهما قالو ومهما عادوا
انتي اللي يانتي انتي السند
منقوشه في جبين القمر
صبر وجلد
تهتف نجوم سهرانه
بعيون تعبانين
لجل اللي راح
واللي بقي واللي اتولد
مدد مدد
مدد يا كل المسلمين
مدد يا شعب
بكل مله وكل دين
مدد ضمير عمل وكد
لجلن نلاقي يوم الحصاد
شئ ينحصد
********************
اه يا بلد
يا دموع علي صدر السنين
اكلوكي حبة نصابين
ظلموكي حبة افاقين
جم جربوا فيكي
التجارب اجمعين
خلوا المعيشه
لاهلك انتي الطيبين
هم ونكد
******************
اه يا بلد
زرعت علي شطوط الترع
رقص وغني
ومكان غيطان الغله اسمنت وبني
نسيت اصول الزرع نسيوا الميكنه
ولما جه تاني القمر.... يضحك لنا
يا خساره كانت السكه سد
يا فلاحين مدد مدد
***********************
اه يا بلد
سكلانس.... ترطن باللغات الاربعه
فيها اللي بشرب من الترع
وناس..... مياهها معدنيه مدلعه
فيها اللي مش لاقي اللضا
وناس بتجري عالدشاش متصربعه
فيها اللي لابسين الملس
وناس بتمشي بالبيكيني مفرعه
فيها اللي ساكنين في المقابر
وناس بتلعب وبتاكلها مولعه
اه يا بلد
نسيت اصول دينها المتين
مفضلش منه غير الدعا
********************
اصرخ يا نهر النيل.. مدد
تصحي الفراعنه معلمين
اصرخ يا جيل بالحيل مدد
ييجي ابن سينا والفرابي
ييجي امير المؤمنين
اللي بيسال علي النجوم
لازم طريقه يبقي جد
مدد يا شعب اصيل مدد