في حب الاسكندرية

في حب الاسكندرية
بقلم / TAGOLAY

ادانك جوا جوف اللي..... يناديني
اقوم من النوم اضمك او تضميني
يشقشق فجرك النادي علي جبيني
اقول الله علي طبعك ...سحرتيني
سكاكين الهوي تدبح ...
.وسكينتك بتحييني
اشوف الغربه ميت غربه..
واهرب منها وتجيني
كتمت دموعي جوه حجاب..
وقلت انساكي انسيني
لقيت اللي نسيته اليوم ..
يجيني منام ..يصحيني
اعود لك تاني من الحرقه..
واقول يا امايا سامحيني
*********************
بصبح والصباح لله ...صباح بمقاس
ما فيهشي زياده ولا قله.. لكل الناس
علي شط البحور طاله ياقوت والماس
والوان طيف بتتجلي عروسه وكاس
**********************
اقول سمرا.......تناغيني
اقول شقرا ......تلاغيني
واقولك ايه علي عيونك.... وحشتيني
علي شطك علي بحرك...
...... علي حضنك يدفيني
هواكي كان حياه او موت..
..... يا تاخديني يا تنهيني
دا بحر الشوق مالوش أخر..
.....علي مرساكي رسيني
**********************
عروسه وزينة الاعراس...
وفيكي كل شيء ينباس...
دا ندر عليه يوم الوعد...
....ووعد الحر ما ينداس
لرش الملح سلطاني....
....وشرباتك عصير اناناس
وتبقي الزفه طول الليل...
....من العجمي لابو العباس
ونرجع تاني ونعيدها......
....من المعموره للمتراس
*****************